NTT Data izeneko enpresa multinazionala, teknologia aholkularitzako zerbitzuetan espezializatua dena, garaile izan da Bizkaiko Foru Aldundiaren Gizarte Ekintza Sailak BIOK! plataformaren bidez antolatutako berrikuntza irekiko erronkan.
Foru-erakundeak erronka hori antolatu du mendekotasun-egoeran dauden pertsonak nahi gabe instituzionalizatzeko arriskua prebenitzeko eta minimizatzeko estrategiak identifikatzeko, pertsona horien zaintza etxean egiten denean, beren bizi-kalitatea eta zaintzaile ez-profesionalena hobetzeko. Finaleko proposamenak aztertu ondoren, NTT Data konpainiaren soluzioa aukeratu da, zeina, analisi aurreratuan eta eredu prediktiboetan oinarrituta, “aukera ematen baitu nahi gabeko instituzionalizazioa eragin dezaketen kausak eta arrisku-faktoreak modu eraginkorrean identifikatzeko eta horiei heltzeko. Gainera, tresnak ditu arreta-estrategia hobeak diseinatzeko”.
Gizarte Ekintzako foru-diputatu Sergio Murillok hauxe adierazi du: “gizarte-ekintza modernizatzeko ere teknologia eta datuak beharrezkoak dira. Gure konpromisoa da Bizkaian mendekotasun-egoeran dauden pertsonen eta zaintzen dituztenen laguntza eta zaintza gehiago pertsonalizatzea. Horretarako, administrazio publikook laguntzaileak bilatu behar ditugu datuen eta teknologiaren potentzial osoa pertsonen bizi-proiektuen zerbitzura jarri ahal izateko”.
Gizarte Ekintza Sailarekin batera proiektu pilotu bat garatzea da hurrengo pausoa, soluzioa baliozkotzeko eta lan-ildo horretan sakontzeko. NTT Data konpainiak honako hau adierazi du: “oso lan gogobetegarria da, BIOK! erronka bat den aldetik, guztiz bat datorrelako NTT Datak datuen analisiaren esparruan duen estrategiarekin, eta, zehazki, Health & Social Care ezagutza-ildoarekin (osasuna eta gizarte-arreta). Horrez gain, gogobetegarria da foru-taldeekin izandako lankidetzaren gertutasunagatik”.
Gizarte Ekintzako foru-diputatuak egindako prozesuaren berri emango du II. Baidata Foroan, ekainaren 14an, Euskalduna Jauregian.
