Urriaren 27ra arte epea irekita egongo da ABIATU Sarirako hautagaitzak aurkezteko. Sari horrekin Zitek Programak UPV/EHUko Bizkaiko Campuseko unibertsitate enpresa berritzaileak eta oinarri teknologikoa dutenak sortzea aitortzen du.

Bertan parte hartu dezakete 2020ko urtarriletik 2023eko abendura JEZen altan eman ziren enpresek eta UPV/EHUko ikasleek, irakasleek, bekadunek, ikertzaileek edo spin-off sustatzaileek bultzatu dituztenek.

Saria 20 000 eurokoa da eta gutxienez lau enpresen artean banatuko da diru kopuru hori. Zitek Programa orain dela bi hamarkada baino gehiago UPV/EHUk, Ekonomia Sustapeneko foru sailak eta Beazek martxan jarri zuten ekimen bat da, eta bere xedea da unibertsitateko kolektiboaren artean kultura ekintzailea hedatzea eta spin-offen sorkuntza suspertzea.