Berrikuntza irekiko biok! erronka berria jarri dugu abian Bilbao Bizkaia Ur Partzuergoarekin batera. Erregistratu gabeko uraren kontsumo baimenduak neurtu eta horien kudeaketa optimizatu nahi du enpresak. Proiektua definitzen duen beste ezaugarrietako bat da I+G lantaldearen eta kanpoko berrikuntza-eragileen arteko lankidetzaren alde egitea.
Erregistratu gabeko ura (EGU) hornidura- eta banaketa-sareei ematen zaien ur-bolumena da, eta ez da neurgailuetan erregistratzen. Honela banatzen da: galerak eta kontsumo baimendua. Azken hori, batez ere, suhiltzaileek eta garbiketa-zerbitzuek erabiltzen dituzten udal hornidura-sistemetan sortzen da.
Gaur egun, Bilbao Bizkaia Ur Partzuergoak 3.000 km-ko sare administratzen du, eta hor 3636 sute-aho eta 9541 ureztatze-aho daude zerbitzuan, ur-emari ezezaguna erabiltzen dutenak. Bolumen hori ezagutzeak eta murrizteak, kudeaketa optimizatzeaz gain, matxurak mugatzea eta energia-kontsumoa murriztea ahalbidetuko luke.
Biok! erronkaren bidez, Bilbao Bizkaia Ur Partzuergoko I+G taldeak irtenbide berritzaileak eta ekonomikoki bideragarriak bilatzen ditu, ekipo horien kontsumo-bolumena neurtu edo estimatzeko eta datuak enpresari helarazteko, gutxienez egunero.
Parte-hartzea zabalik dago ekintzaileentzat, startupentzat, ETEentzat, teknologia-zentroentzat edo edozein tokitako unibertsitateentzat, eta haien proposamenek erantzun osoa edo zati bat eman ahal izango diote erronkari.
Proiektuak aurkezteko epea azaroaren 27ko 18:00ak arte egongo da zabalik.
Hortik aurrera, hautaketa-prozesu bat jarriko da abian, eta abenduaren 1etik 11ra bitartean amaituko da, aurrez sailkatutako taldeekin elkarrizketak egiten direnean. Abenduaren 18a baino lehen jakingo da zeintzuk pasako diren finalera. Urtarrilaren 12tik 13ra bitartean, finalistek in factory trip txapelketa egingo dute, proposamenak are gehiago doitzeko. Otsailaren 5ean jakinaraziko da irabazlea zein den.
Hurrengo sei hilabeteetan, talde sustatzaileak, enpresarekin batera, proiektuaren pilotu bat garatuko du, gehienez 15 000 euroko baliokoa, Bilbao Bizkaia Ur Partzuergoaren sareko udalerrietako batean egiaztatuko dena.
