Arabako, Bizkaiko eta Gipuzkoako foru aldundiek neurri sorta berria aurkeztu dute, inflazioari eta egungo egoera ekonomikoaren ondorioei aurre egiteko. Hiru lurralde historikoen artean modu harmonizatuan hartutako neurri hauek 249,5 milioi euroko ahalegin fiskal bateratua ekarriko dute. EAEko zergadun guztiak izango dira onuradunak, eta intentsitate handiagoa izango du zaurgarrienen kasuan.
Deflaktazioa
Lehenengo neurriak Pertsona Fisikoen Errentaren gaineko Zergaren (PFEZ) tarte guztiak % 4 deflaktatzea dakar. Horrela, zerga horren ordainketa egungo egoera ekonomikora egokitu nahi da, inflazioaren ondorioz egiten diren soldata igoerek faktura fiskala handitzea eragin ez dezaten. Gogoratu behar da foru ogasunek % 1,5 deflaktatu zutela PFEZa urte hasieran; beraz, deflaktazioaren zifra guztira % 5,5ekoa izango litzateke, azpiko inflazioaren azken adierazle aurreratuarekin bat datorren zenbatekoa.
Neurria irailaren 1ean sartuko da indarrean; beraz, iraila eta urte amaiera bitartean ordaintzen diren soldatetan berehalako eragina izango du. Bestalde, lehenago ordaindutako nominen kasuan, atxikitako gehiegizko zenbatekoak hurrengo Errenta kanpainan doituko dira. Neurriak EAEko errenta-zergadun guztiei egiten die mesede, eta 139,1 milioi euroko eragin bateratua izango du hiru lurraldeetan.
Inflazioaren aurkako kenkaria
Bestalde, foru ogasunek inflazioaren aurkako 200 euroko kenkaria ere onartu dute, 30.000 eurora arteko errenta oinarri orokorra duten zergadunek aplikatu ahal izango dutena. Aldiz, 30.000 euro eta 35.000 euro bitartean, 200 euroko kenkaria pixkanaka murrizten joango da, aitorpenaren oinarria handitu ahala. Neurriak egungo egoeraren aurrean egoera zaurgarrienean dauden zergadunetan jartzen du arreta, eta guztira 110,4 milioi euroko kostua izango du hiru foru ogasunentzat. Honen eragina hurrengo Errenta kanpainan islatuko da.
Beste neurri batzuk
Gainera, Arabako, Bizkaiko eta Gipuzkoako aldundiek beste neurri finantzario batzuk ere hartu dituzte, pertsona autonomoen eta enpresen egoera arintzeko eta hauei likidezia gehiago emateko. Autonomoen kasuan, ekitaldi honetako hirugarren eta laugarren hiruhilekoetako ordainketa zatikatuak egiteko betebeharretik salbuetsita geratzen dira. Bestalde, 50 milioi eurotik beherako eragiketa bolumena duten eta enpresa-taldeetan sartuta ez dauden enpresek ere ez dute Sozietateen gaineko Zergaren ordainketa aurreraturik egin beharko. Azkenik, 11/2022 Errege Dekretu Legea dela eta jasotzen diren 200 euroko dirulaguntza publikoak salbuetsita geratzea erabaki dute foru Ogasunek.
